تفريغ محاضرة للدكتور عباس سيف النصر معهد بحوث ووقاية النبات خاص بجروب اخبار المانجو في مصر
اضغط على الصورة لتكبيرها
النهاردة ان شاء الله هنتكلم عن مشكلة العفن الهبابى فى مصر
هنتناول بالتدريج الأسباب بتاعتها
والأضرار والاجراءات الوقائية والاجراءات العلاجية
باختصار عشان نلقى الضوء على المشكلة دى عشان الكل يبقى عارف ابعادها ايه
في البداية ماهو العفن او العفن الأسود ؟
طبقة لونها اسود
تغطى الأوراق بتاع الأشجار السطح العلوى لاوراق المانجة
السبب الأساسى فيه عندنا مجموعة من
الإصابات الحشرية بالحشرات الثاقبة الماصة مثل البق الدقيقى وأكثر الأنواع الموجودة فى مزارع المانجة البق المصرى والبق الأسترالي وبق سيشل لارم
كمان فى نوع من الحشرات القشرية الرخوة
وطبعا الحشرات القشرية نوعين
صلبة لا تفرز ندوة عسلية
الرخوة تفرز ندوة عسلية وبتكون احد الأسباب العفن الأسود
كمان الإصابة بحسرات المن كمان الإصابة بنطاطات الأوراق
وهنا ايضا عايزين نركز على نقطة ان احنا عندنا نوعين من النطاطات
نطاطات الاوراق و نطاطات الأعشاب
اللى بيسبب الندوة العسلية نطاطات الأوراق
طيب
الحشرات دى ليه هى بتفرز ندوة عسلية ؟
هى حشرات معظمها حشرات صغيرة صغيرة الحجم وضعيفة
نتيجة لكده بتحاول تحط عدد كبير جدا من البيض
عشان تحط عدد كبير جدا من البيض هذا يستدعي ان هى يكون عندها مخزون عالى من البروتين
فبتضطر ان تسحب جزء كبير جدا من العصارة النباتية بتاخد احتياجاتها من البروتين والكربوهيدريت والسكريات
اما السكريات الزيادة والكربوهيدريت الزيادة بتروح مخرجاتها على صورة ندوة عسلية
الحشرات دى معظمها وخاصة البق الدقيقى والحشرات القشرية الرخوة بتبقى موجودة على السطح السفلى للورقة كنوع من الحماية لنفسها من الأعداء اللى حوليها الأعداء الحيوية ،الظروف الجوية الحاجات دى كلها لانها حشرات صغيرة فبتبقى موجودة على السطح السفلى للورقة فلما نقطة الندوة العسلية بتيجي تخرج منها فبتسقط على السطح العلوى للورقة اللى تحتيها
وبالتالي مجموعة نقاط الندوة العسلية بتكون موجودة على السطح العلوى للأوراق مع الأتربة اللى موجودة فى المزرعة ومع الغبار ومع وجود الفطريات العفن الأسود وهى فطريات رٌمِّية يعنى لا تتغذى على النسيج بتاع الأوراق بتاع المانجة ولكن هى بتتغذى على مكونات الندوة العسلية وبالتالي بتبدا مجموعة فطريات العفن الأسود تنمو وتغطى السطح العلوي للأوراق
طيب
دلوقت الورق مغطى بالسطح العلوى جزء من قطرات العسل دى بتنزل على الشماريح الزهرية وبتنزل على اجزاء تانية من النبات وبالتالي تنمو عليها ايضافطريات العفن الهبابى الأسود
طيب
دلوقت فطريات العفن الأسود تواجدت على الندوة العسلية الموجودة على الأوراق
فى عوامل تانية بتساعد فى نمو هذه الفطريات كمان بالاضافة الى المكونات بتاع الندوة وهو ارتفاع نسبة الرطوبة داخل الشجرة وده بيبقى راجع الى تداخل أفرع الشجرة وقلب الشجرة بيبقى مقفول وعملية التقليم لا تتم بالشكل اللى بيوصى بيه المختصين فى عملية البساتين او فى عمليات الخدمة بتاعت البساتين فبتكون النتيجة ان الفطريات بتبدأ تزيد وبتنتشر داخل الشجرة وبتعمل الشكل او المظهر اللى كلنا بنشتكي منه
طيب
دلوقت اصبح عندى حشرات ثاقبة ماصة بتطلع ندوة عسلية نمى عليها فطريات العفن الأسود وغطت الأوراق وبعض الشما ريخ الزهرية والأجزاء الاخرى من الشجرة
طب هو ايه الضرر اللى هيحصل لى نتيجة وجود عفن اسود ؟؟
الأوراق بيتم فيها عملية البناء الضوئي
كلمة بسيطة عن البناء الصوئى ؛النهاردة عملية البناء الضوئي عبارة عن ايه ؟
ميه جايه من الجذر بتاع الشجرة بييجى عند الأوراق الاوراق بتبدأ تمتص ثانى أكسيد الكربون فى وجود أشعة الشمس. بتبدا تحول العناصر اللى جاية مع الميه من الجذور مع ثانى أكسيد الكربون وبتتم عملية التمثيل او البناء الضوئي عشان تطلع العناصر اللى هتبدأ الشجرة تتغذى منها وتكون منها الأزهار والثمار وكل المكونات بتاعت الشجرة
اصبح النهاردة لما انا المادة الخضراء اللى هتعمل عملية البناء الضوئي للحاجات دى فى وجود أشعة الشمس المادة دى انا غطيتها بمادة سوداء نتيجة تغطية الأجزاء دى بالعفن الأسود يبقى اصبح انا اثرت على عملية البناء الضوئي وقللت من كفائتها حسب كمية
قللت من كفائتها حسب كمية الفطريات الموجودة على الورقة إذا كانت مغطية الورقة كلها او مغطية نصها او أكتر او اقل
النتيجة بصفة عامة ان بيحصل خفض فى كفائة عملية البناء الضوئي وبالتالي دا كله بينعكس على حالة النبات وعلى المنتج فى الاخر
بعض كمان من الندوة العسلية اللى بتنزل على الثمار اذا كانت الثمار موجودة فى هذا الوقت بتنمو عليها فطريات العفن الأسود برضو وتؤدى الى خفض القيمة التسويقية بتاعتها
يبقى انا دلوقت قلت عن الأسباب وقلت عن الأضرار
ابدأ أتكلم عن الإجراءات الوقائية اللى المفروض ان اتخذها ،،
المفروض من بعد جمع المانجة ابدأ على طول فى عمليات الخدمة بتاعتى انا عندى بعد الجمع فى أفرع مكسرة وفى أفرع أساسا متشابكة فبأبدأ بتقليم الأفرع الجافة والمتشابكة مع بعضها مع الإجراءات اللى بنعملها بعد كدة اللى هو بندهن أماكن القطع دى علشان ما تبقاش مصدر لدخول الحفارات بعد كده
النقطة اللى بعديها يجب ان نسبة الرطوبة داخل الأشجار ما تبقاش عالية فبنظم عملية الرى حسب برنامج الرى حسب حالة التربة ونوعها والوقت اللى انا بروى فيه
النقطة اللى بعديها مكافحة الحشرات خاصة الثاقبة الماصة اللى هى بتفرز الندوة العسلية
بعد ما ابدأ جمع الثمار الخطوة اللى بعدها ببدأ عملية التقليم
بعد عملية التقليم ببدأ ادخل فى مرحلة ان المقصات دى كانت ماشية فى أفرع مصابة من تكتلات وامراض المختلفة فبتبدأ المقصات دى فى نقل العدوى للأفرع والاسجار السليمة
فالخطوة الاولى المفروض بعملها بعد الانتهاء من عملية التقليم والتخلص من مخلفات التقليم بالشكل اللى بيوصى بي زملائنا بتوع البساتين
أبدا عملية تطهير للشجرة وفى نفس الوقت مكافحة الحشرات الموجودة على الشجرة
فالتوصية العامة اللى معظمنا ماشى بيها طبقا لتوصيات وزارة الزراعة ان احنا بنرش خليط من الزيت المعدنى الصيفى مع احد المطهرات
ولما اجى ارش الزيت المعدنى عندى شروط وشروط مهمة جدا لان ليها تأثير فى عملية المكافحة
لما اجى إرش الزيت المعدنى طبعا فى زيت معدنى صيفى وزيت معدنى شتوى ، الصيفى تركيزه ١.٥٪ يعنى لتر ونصف لكل ١٠٠ لتر ماء يعنى حوالي ٩لتر للتانك ال ٦٠٠ لتر
والشتوى تركيزه ٢٪يعنى ٢لتر لكل ١٠٠لتر ماء او ١٢لتر للتانك ٦٠٠لتر
هنا لو انا هرش الزيوت المعدنية وهقول برضو ان فيه حاجات تانية غير الزيوت المعدنية بس انا يركز على الزيوت المعدنية لكفائتها العالية
الزيوت المعدنية فى الحالة دى لازم ان انا
١-أخلى ضغط الموتور عالى
٢-أخلى فتحة البشبورى على شكل صاروخ
٣-اعمل عملية غسيل كاملة للشجرة بغسل غسيل جيد جدا
طيب
هو ضغط الموتور وفتح البشبورى على شكل صاروخ بيفيدنى بأيه ؟؟
دا بيفيدنى فى
١-الحشرات القشرية والبق الدقيقى والمن اذا كان موجود والنطاطات والحشرات اللى هى بتفرز ندوة عسلية دى كلها حشرات ضعيفة
البق الدقيقى والحشرات القشرية مغطية جسمها بإفرازات شمعية وإفرازات دقيقية
كوني ان انا أخلى البشبورى الضغط بتاعه على شكل صاروخ فأنا بالطريقة دى بأطير الإفرازات الدقيقية والإفرازات الشمعية او الغطاء الشمعي الموجود على ظهر هذه الحشرات
كونى ان اتخلصت من الإفرازات الشمعية وهذا الغطاء انا كدا عرضت الحشرات دى وعريتها من الدرع اللى كان بيغطيها فأصبح هنا اى حاجة بسيطة موجودة حواليها
هتأثر عليها
انا هنا بالاضافة ان انا رفعت الغطاء عنها انا كدا هرش عليها الزيت هيبدأ الزيت هييجى على الحشرات دى ،الزيت التأثير بتاعه بيكون تأثير ميكانيكي بمعنى ان هو بيجي بيغطى على الحشرات دى نقطة الزيت فبتعمل لها إختناق ،بالاضافة ان هى متعرية من الغطاء اللى كان بيحميها فأصبحت ضعيفة جدا والتخلص منها بيبقى سهل جدا مافيهوش مشكلة
طيب
انا اتكلمت عن الزيوت المعدنية
فى حاجة تانية مش كلنا بتقدر نشترى الكيماويات الموجودة بالأسواق اللى الوزارة بتوصى بيها فى تحضيرة اللى هى تحضيرة الصابون البوتاسى
الصابون البوتاسى دى عبارة عن صابون زراعى هيدروكسيد بوتاسيوم مخلوط عليه حمض سلفونيك ومدوبينه فى ميه
وهناك شركات بدأت تنزلها فى صورة مستحضرات جاهزة يعنى عشان اللى مش عايز يتعب نفسه فى عملية التحضير هى أمنة جدا والتأثير بتاعها نفس الخطوات اللى فى الزيت ان هو بيطير مع ضغط البشبورى بيشيل الغطاءالموجود على الحشرات الموجودة دى
نمرة ٢بيكون له تأثير قوى جدا عليها
٣-ان البوتاسيوم بيحسن من الصفات بتاع الشجرة يعنى
طيب
بالنسبة للصابون البوتاسى انا أحضره ازاى ؟؟لو انا عايز احضره فى المزرعة
طبعا مهم جداان التحضير يتم فى حاجة بلاستيك مايتعملس فى حاجة معدنية
بجيب جردل بلاستيك واضع فيه ٣لتر ماء واضيف اليه ١/٨كيلو هيدروكسيد بوتاسيوم (وده بيتباع عند تجار المبيدات ومحلات العطارة وده بيتباع على صورة قشور )
مهم جدا لما اجى اقلب ما اقلبش بحاجة معدنية احاول اقلب بفرع شجرة او خشبة او اى حاجة مايكونش حاجة معدنية عشان التفاعل
بعد ما بدول هيدروكسيد البوتاسيوم بضيف نصف كيلو حمض سلفونيك
وبالشكل ده انا عندى محلول صابون بوتاسى ٣لتر
طيب
ال ٣لتر انا بخزنهم فى جركن بلاستك على أساس لما اجى استخدمه
المعدل اوالتركيز اللى باستخدامه
انا باستخدم لتر واحد لكل ١٠٠لتر ماء
التركيز ١٪
يعنى لو انا عندى تلت اربع شجرات صغيرين ونستخدم ١٠٠لتر ميه خلاص أحط لتر صابون على ١٠٠لتر ماء وارش على الأشجار
لو انا هيتعمل أكتر من كدا أبدا أحط المعدلات بتاعتها يعنى لو تانك ٦٠٠ هعمل التحضيرة دى مرتين
وتخزينه مافيش منه مشكلة خالص
نقطه مهمة جدا برضو عايز افرق بين الصابون اللى انا باستعمله ده الصابون البوتاسى والصابون اللى بنستخدمه فى غسيل الاوانى بالمنزل ومحطات البنزين بتاع غسيل العربيات وفى المطابخ
الصابون التانى ده صابون صديومى يعنى داخل فيه هيدروكسيد الصوديوم
وهيدروكسيد الصوديوم بالنسبة لو انا رشيته على الأشجار هيعمل حروق فى الاوراق بتاع المانجة
فأنا بستغنى عن هيدروكسيد الصوديوم واستعمل هيدروكسيد البوتاسيوم او ما يسمى بالصابون الزراعى
هو موجود فى الاسواق بعض الشركات بتطلعه فى صورة جاهزة للاستعمال على طول بصفة مباشرة
